بعد مناشدتها للرئيس الاسد.. هل ما حصل لمعلمة علقت "عقبال محافظ حلب"

العالم - سوريا

وتعود القصة الى بوست إعفاء محافظ ريف دمشق من مهامه، والذي نشرته صفحة رئاسة السورية على الفيسبوك لتعلق وفاء سكيف المعلمة في إحدى مدارس حلب عليه بكومنت: عقبال محافظ حلب.. والذي كان كافياً لنقلها الى مدرسة تبعد 90 كم عن منزلها في المدينة!!

وجاء في المنشور الذي نشرته سكيف على صفحتها الشخصية على فيسبوك والذي رصدته وكالة أوقات الشام الاخبارية: كتار نصحوني اسكت ومااعمل شوشرة مشان مايودوني ورا الشمس عقولتن بس ماتعودت اسكت عن حقي او ارضى بالظلم ..

يوم الأربعاء المسا بعد صدور مرسوم السيد الرئيس بإعفاء محافظ ريف دمشق .. علقت عالخبر / عقبال محافظ حلب / متل مو شايفين بالسكرين .. تاني يوم الخميس الضهر بتوجيه من محافظة حلب تحديداً من شخص يدعى / ديمتري عيسى / لمدير التربية بتطلع بحقي عقوبة بسبب تعليقي عالفيس عصفحة الرئاسة عن المحافظ بنقلي ع / دير حافر قرية أبو جدعة تبعد عن حلب ٩٠ كم / بشكل دائم.

طلبت مقابلة مدير التربية ورفض يشوفني وبرر بأنو الموضوع مو بإيدو والقرار بناء عتوجيهات مكتب المحافظ بسبب تعليقي عصفحة الرئاسة ونصحوني بالتربية إني أروح اعتذر واقدم اقصى درجات الندم على ماقترفته يداي عسى يحن قلبن علي ويرجعو عن قرارن وطبعا رفضت لأني مو غلطانة لأعتذر.

هي جزاة المعلم عندنا عم نتحمل المتاعب كلا و الظروف الصعبة والراتب الزهيد كرمال نحاول نبني جيل جديد مثقف وواعي وتضلا هالبلد واقفة عرجليا … والمكافأة متل مو شايفين نقل دائم عأبعد منطقة بريف حلب عطريق الرقة ..

تعليقي بشوفوه بس مابشوفو الطوابير المكدسة بالبلد عالخبز والسكر والرز والزيت والبنزين والمازوت يلي ماتوزع لسا .. مابشوفو الناس الي نايمة بالشوارع ماعندا سقف يقويها.. مابشوفو حال المناطق الشرقية يلي لهلأ ماازالو الركام منها ومابشوفو بناياتها كيف عم تقع بيلي فيا كل شتا مابشوفو المناطق يلي بلا كهربا ومابشوفو عصابات السرقة يلي ماتركت حدا من شرا وبنص النهار عم تسرق موبايلات العالم بكل وقاحة وماحدا بردا وغيرا من أشكال الفوضى يلي موجودة بالبلد من تشبيح وقتل على أعين الناس ..

بس بشوفو تعليقي يلي هو سبب الفوضى بالمدينة ولازم يتخذو فيني عقوبة رادعة مشان اسكت والتهي بطريق دير حافر ..

نحنا بدل مانعالج المشكلة واسباب التقصير بنكتم صوت الي حكا وبنخليه يتشنطط وتطلع روحو مشان يتربى ومايرجع يحكي …

الي اقترح القرار مفكر انو بهالتصرف رح غير رأيي مثلاً أو صير سفق وطبل متل بقية العالم يعني ؟
ماخطرلو العواقب .. لأنو الكل تعود ياكل الضرب ويسكت بس انا مارح اسكت لأني مالي غلطانة

ومتأكدة إنو السيد الرئيس مابيرضى عن هالافعال أبداً وبجوز ولعل وعسى يصلو هالتصرف الي صدر من مكتب المحافظ يلي السيد الرئيس حط حلب أمانة برقبتو .. ماحط رقبة حلب بإيدو ..
بتمنى تشاركو البوست ويصل لأكبر عدد من الناس ..

وأصدر وزير التربية السوري، دارم الطباع، قراراً تم من خلاله إلغاء قرار نقل المعلمة ولاء سكيف، التي أثارت الجدل اليوم بقرار نقل مكان عملها لمسافة 90 كم.

وفي تصريح للإذاعة السورية الرسمية "نينار إف إم"، قال الطباع: "بعد التشاور مع مدير تربية حلب تم إلغاء قرار نقل المعلمة ولاء سكيف"، مشيرا إلى أن "قرار نقل أي مدرس في وزارة التربية لا يعتبر عقوبة".

وفي وقت سابق، أفاد مدير تربية حلب، إبراهيم ماسو، في حديث لنفس الإذاعة، قال فيه: "وزارة التربية تلغي قرار نقل المعلمة ولاء سكيف إلى دير حافر"، موضحا أن "اقتصار العقوبة على نقلها إلى مدرسة أخرى في نفس منطقتها".